Psalms 89

1Ngizahlabelela ngothando lukaJehova olukhulu lanininini; ngomlomo wami ngizakwenza ukuthembeka kwakho kwaziwe ezizukulwaneni zonke.

2Ngizamemezela ukuthi uthando lwakho lumi luqinile laphakade, ukuthi ukuthembeka kwakho wakugxilisa ezulwini uqobo.

3Wathi, “Sengenze isivumelwano lalowo okhethiweyo wami, sengifungile kuDavida inceku yami,

4‘Ngizawumisa umndeni wakho laphakade, ngisiqinise isihlalo sakho sobukhosi kuzo zonke izizukulwane.’ ”

5Amazulu ayazidumisa izimanga zakho, O Jehova, lokuthembeka kwakho emhlanganweni wabangcwele.

6Phela ngubani onjengoJehova phakathi kwabaphilayo ezulwini na? Ngubani onjengoJehova phakathi kwabaphilayo ezulwini na?

7Enhlanganisweni yabangcwele uNkulunkulu uyesatshwa kakhulu; uyesabeka kulabo bonke abahlezi laye.

8Yebo Jehova Nkulunkulu Somandla, ngubani onjengawe na? Ulamandla, O Jehova, ukuthembeka kwakho kukuhonqolozele.

9Uyabusa phezu kolwandle olugubhazelayo; lapho amavinqo alo equbuka, uyawathulisa.

10Wamchoboza uRahabi njengomunye wababuleweyo; ngengalo yakho elamandla wazichitha izitha.

11Ngawakho amazulu, ngowakho njalo lomhlaba; wawudala umhlaba lakho konke okukuwo.

12Wayidala inyakatho kanye leningizimu; iThabhori leHemoni zihlabelela ibizo lakho ngentokozo.

13Ingalo yakho igcwele amandla; isandla sakho siqinile, esokunene siphakeme.

14Ukulunga lokwahlulela kuhle yikho okuyinsika yesihlalo sakho sobukhosi; uthando lokuthembeka kuhamba phambili kwakho.

15Babusisiwe labo asebekufundile ukukubabaza, abahamba ekukhanyeni kobukhona bakho, O Jehova.

16Bayathokoza ngebizo lakho ilanga lonke; bayagubhazela ngokulunga kwakho.

17Ngokuba uyibukhosi babo lamandla abo, kuthi ngomusa wakho uphakamise uphondo lwethu.

18Ngempela isihlangu sethu ngesikaJehova, lenkosi yethu ingeNgcwele Yodwa ka-Israyeli.

19Endulo wakhuluma ngombono, ebantwini bakho abathembekileyo wathi: “Sengiwehlisele amandla phezu kweqhawe; sengiphakamise insizwa phakathi kwabantu.

20Sengifumane uDavida inceku yami; ngamafutha ami angcwele sengimgcobile.

21Isandla sami sizamsekela; ngempela ingalo yami izamqinisa.

22Akulasitha esizamcindezela ukuthi athele kuso; kakho umuntu omubi ozamcindezela.

23Ngizazichoboza izitha zakhe phambi kwakhe ngibalahlele phansi abalwa laye.

24Uthando lwami oluthembekileyo luzaba laye, ukuthi ngebizo lami luphakanyiswe uphondo lwakhe.

25Ngizabeka isandla sakhe phezu kolwandle, isandla sakhe sokunene phezu kwemifula.

26Uzamemeza kimi athi, ‘UnguBaba, Nkulunkulu wami, iDwala elinguMsindisi wami.’

27Njalo ngizakummisa abe lizibulo lami, inkosi ephakeme ngaphezu kwawo wonke amakhosi omhlaba.

28Ngizalugcina uthando lwami kuye laphakade, lesivumelwano sami laye kasiyikuphela.

29Inzalo yakhe ngizayimisa nini lanini, lesihlalo sakhe sobukhosi kasiyikufa saphela.

30Aluba amadodana akhe edela umlayo wami angalandeli iziyalezelo zami,

31uma besephula izimemezelo zami behluleke ukugcina imiyalo yami,

32ngizajezisa isono sabo ngoswazi, lesiphambeko sabo ngokubatshaya;

33kodwa kangiyikulususa uthando lwami kuye, njalo kangisoze ngiguqule ukuthembeka kwami.

34Kangiyikusephula isivumelwano sami kumbe ngiguqule lokho okuphume ezindebeni zami.

35Ngavele ngafunga kanye ngobungcwele bami – kangiyikuqamba amanga kuDavida –

36ukuthi inzalo yakhe izaqhubeka laphakade lesihlalo sakhe sobukhosi sizakuma phambi kwami njengelanga;

37sizakuma laphakade njengenyanga, ufakazi othembekileyo yisibhakabhaka.”

38Kodwa usumalile, usumlahlile, ubumthukuthelela kakhulu ogcotshiweyo wakho.

39Ususikhalele isivumelwano lenceku yakho wawubhuqela othulini umqhele wakhe.

40Usuyibhidlizile yonke imiduli yakhe, izinqaba zakhe wazenza amanxiwa.

41Bonke abedlula khona bamphangile; useyinhlekisa yabomakhelwane.

42Usuphakamisile isandla sokunene sezitha zakhe; usuwenze zonke izitha zakhe zathokoza.

43Uyibuyisele emuva inkemba yakhe ebukhali awaze wamsekela empini.

44Usuyiqedile inkazimulo yakhe wadaklazela phansi isihlalo sakhe sobukhosi.

45Uluqumile lwaba lufitshane usuku lobutsha bakhe; usumembese ingubo yehlazo.

46Koze kube nini, O Jehova? Uzazifihla kokuphela na? Koze kube nini ulaka lwakho luvutha njengomlilo?

47Khumbula ukwedlula masinyane kwempilo yami. Ngoba wabadalela ize nje abantu!

48Ngumuntu bani ongaphila angaze abona ukufa, loba azisindise emandleni eliba na?

49Hawu Jehova, lungaphi uthando lwakho lwakudala olukhulu, okwathi ngokuthembeka kwakho wafunga ngalo kuDavida?

50Khumbula, Jehova ukuthi inceku yakho iklolodelwa njani, ukuthi enhliziyweni yami ngithwele izigcono zezizwe,

51izigcono izitha zakho eziklolode ngazo, O Jehova, okuthe ngazo zaklolodela ogcotshiweyo wakho kukho konke akwenzayo.

52Udumo kalube kuJehova laphakade! Ameni njalo Ameni.